Home Sweet Home

Sunday, October 08, 2006

عمار يا مصر

من اسـبوع كدة اتخبط فى نافوخى و قررت اشـترى بنطلون جينز. من باب العلم بالشـئ أنا سـبت مصر من 8 سـنوات تقريباً و علاقتى بأرض الكنانة تلخصت فى الأجازات السـنوية أو النصف سـنوية. يعنى بمعنى أصح عملية التسـوق فى الاسـواق المصرية اتلغت من زمان من قاموسـى. ماهو أصلى بصراحة مش حضيع الشـهر الأجازة فى اللف على المحلات


المهم، من يومين كده قررت أن بما أننى عدت إلى الوطن عودة مؤقته فمفيش مشـكلة بقى من زيارة سـريعة كدة لمحل جينز محترم. فعلى السـريع قمت ببعض الأبحاث الميدانية للتعرف على محل يكون محترم وكويس و إبن حلال علشـان مضيعش وقتى على الفاضى. أسـفرت هذه الأبحاث عن محل واحد هوا اللى عليه العين


ولاد الحلال جزاهم الله خيراً قلولى عليكى وعلى محل إنرجى فى المهندسـين، وعنها، مكدبتش خبر، ركبت الناقة وشـرخت على إنرجى. الجدير بالذكر بقى إن أخر مرة أشـتريت فيها جينز من مصر كان من حوالى عشـر سـنين وكان بقى جينز مجبتهوش ولادة، كان سـعره 250 جنيهاً مصرياً. و فى نفس الحقبة الزمنية دى كان فى جنزات كتير أرخص من كده بكتير، نظام 100 و 150 جنيه، بس كونى بقى عايئه ومديئة قررت أشـترى أبو 250 جنيه و إنشـلا ما حد حوش بقى

المهم، نرجع مرجوعنا لإنرجى، المحل عبارة عن 3 أدوار. دخلت الدور الأول وكلى إقبال على الحياة و بدأت ألقى نظرة، لقيت المعروضات عبارة عن قمصان أو تى شـرتات منقطة أو مخططة أو مشـجرة أو مطرزة بكم هائل من الألوان، حاجات لطيفة خالص، بس الملفت للإنتباه إن مقاسـات المعروضات تعتبر كبيرة شـوية
بصراحة، شـميت ريحة غدر فى الموضوع. فندهت الأسـتاذ المبجل المسـئول عن القسـم وسـئلته بكل بسـاطة: هوا لو سـمحت الحاجات دى حريمى ولا رجالى، أصلنا بقينا فى زمن اليونى سـكس والواحد مبقاش عارف الراجل من السـت، بصللى كدة باسـتغراب وقلى: طبعاً رجالى
طبعاً طبعاً ماهو واضح بس أنا سـاعات بعانى من العشى الليلى بعيد عنك

المهم، طلعت بكرامتى كدة على الدور الثالث حيث الملابس الحريمى
الراجل، و الابتسـامة من الودن للودن: بتدورى على حاجة معينة يا أنسـة
أنا: بنطلون جينز ميكونش لو واست (أى وسـط سـاقط) و يريت بقى لو يكون بلو بلاك، واخدين بالكو، وكمان بتشـرط. أرشـدنى الرجل الى المكان المعروض فيه البنطلونات وقال لى ولسـة بقه من ودنه اليمين لودنه الشـمال، على فكرة إحنا عندنا خصـم 30 فى الميه
بدأت اتفرج على الموديلات فى صمت وأحاول أن أجد طلبى، وبعدين أتخبطت فى نافوخى لتانى مرة وقررت أبص على كرت السـعر، يعنى من باب العلم بالشـئ
للوهله الأولى لم أسـتطع تمييز إذا كان الرقم ده السـعر ولا الكود ولا رقم كده بيتفائلوا بيه وخلاص حيث أن الكرت كان مكتوب عليه 1150
بصيت على الجينز اللى بعده لاقيت مكتوب عليه 970!!! وكان فى واحد شـعبى كده مش أد المقام بـ 780 جنيه

أنا بس عايزه حد يقولى هوا أنا إللى تخلفت بسـبب بعدى عن مصر وهوا ده العادى ولا المحلات دى محلات مرش (غسـيل) أموال ولا الناس فى مصر فلوسـها كترت وخلاص مبقناش من دول العالم الثالت

حد ينورنى الله يخليكو


تحديث: بعد خبتى التقيلة فى إنرجى ذهبت بمحض الصدفة إلى كرفور البوابات كما يطلقون عليه، فوجدت هناك محل بولو يعلن عن خصم 50% . أنا بقى قلت أيه فرجت خلاص وكنت أظنها لا تفرج. والحمد لله الذى لا يحمد على مكروه سـواه وجدت الجينز عندهم بـ 2250 بس عليه 50% خصـم و بسـؤال الأصدقاء أكتشـفت أن هى دى أسـعار الجينزات ذات المركات العالمية بس أنا اللى متأخرة شـوية

الحمد لله، مصر لسـه بخير... وعمار يا مصر


Posted by Wonderer :: 11:32 PM :: 17 comments

Post a Comment

---------------oOo---------------